Unglæknakrapp

Finnið fimm villur á eftirfarandi mynd:



Unglæknirinn til hægri á myndinn er eflaust að blóta því hversu lélegt gönguskíðafæri sé á sumrin. Eða að spá í því hversu langt sé síðan hann sagði síðast að eitthvað þyrfti að gerast "STAT". Hann er alltént ekki að hugsa út í nauðsyn þess að setja upp einhvern þenkjandi og gáfulegan svip því hann gæti endað í sjónvarpinu síðar meir.

Hann er nú samt vissulega annað hvort besti eða næst-besti frændi í heimi. Fer eftir dagsforminu hverju sinni.

Prósakrapp

Það er hreint út sagt yndislegt þegar einhver góðhjartaður maður úti í heimi sem ég hef aldregi hitt á ævinni ákveður að senda mér svona ljóðrænan, hnitmiðaðan og fyrst og fremst upplífgandi prósa í tölvupósti.



Þakka þér fyrir kæri Rón ef þú skyldir vera einn af æstum lesendum Krappetíkrappsins (annað eins hefur nú gerst). Þér hafið gjört minn dag.

Í ótengdum fréttum þá bankaði hefðarfrúin sem býr á neðri hæðinni upp á hjá mér í gær og færði mér væna krukku af dýrindis rabbarbarasultu til að hafa með steiktu kjetbollunum. Æ sér gjöf til gjalda segir máltækið og þarf ég því að gjöra svo vel að vippa fram prjónunum og massa eins og eitt par af grifflum eða litríkt ennisband handa henni.

Mömmukrapp

Ástkær móðir Stilla Vebba, Felga Hrímanns, hefur í dag fagnað sextugsafmæli sínu.



Frá vinstri: Stimmi Frebba, Vebbi Still, Felga Hrímanns og loks góðkunninginn Stilli Vebba.

Yndislegri fjölskylda hlýtur eðli málsins samkvæmt að vera allsvakalega vandfundin.

Innkaupakrapp

Innkaup gærdagsins til heimilisins voru Electrolux þvottavél og Nintendo Wii leikjatölva. Þetta hlýtur að þýða að ég sé a.m.k. hálf-fullorðinn.

Í kvöld mun ég því skella í vél af handklæðum á meðan minn frómi sambýlismaður Gunni Jóh blandar handa okkur margarítur. Síðan munum við spila virtúal-tennis fram á rauða nótt.

Það er ekki hægt að fara fram á meira.

Af góðkunningjanum Stilla Vebba er það að frétta að hans síðustu innkaup voru flugmiði til München-borgar (Mjaðarvalla) að heimsækja ónefndan básúnuleikara. Aðalmarkmið ferðarinnar ku vera að setja Norðurlandsmet í neyslu svínakjöts og hreinleikalagabruggaðs öls. Ég gerði Stilla þann greiða að bóka hressingarvist fyrir hann í Hveragerði þegar heim kemur svo hann nái að jafna sig áður en vinna hefst á ný.

Affi Kak-krapp

Í sjúkum huga Stilla Vebba leynist óljós minning um að hafa staðið sveittur á dansgólfinu í dj-siggarún-áframkeyrðri menningarleysunni inni á skemmtistaðnum Affi Kak seint í gærkvöldi, og sungið "Gíng gang gúllí gúllí" hástöfum ásamt tveimur fyrrverandi undirmönnum sínum úr skátahreyfingunni.

Þegar heim var komið í frábærlega 101-akureyri-staðsettu penthouse íbúð foreldra sinna þá lagðist Stilli í gríðarlega eldamennsku til að sefa sárasta ölvunarhungrið. Fingur hans bera enda þess merki í dag að hann hafi verið heldur ónákvæmur með hnífinn þegar saxa átti niður grænmetið. Næst mun Stilli vera forsjáll og vera búinn að undirbúa helsta hráefnið í nætursnarlið áður en haldið er í sollann á Affi Kak.

Fótboltaleiks-krapp

Mín spá fyrir kvöldið er að 'Pool tapi 2-3, og það verði Pennant og Aurelío sem skori mörkin fyrir Liverpool, báðir eftir fyrirgjöf frá Peter Crouch. Gerrard mun halda hreinu í 91 mínútu í markinu, en endi svo á því að fá á sig 3 mörk í uppbótartíma.

Í kjölfarið mun minn frómi vinnufélagi Magnús Helgason fara að halda með Aston Villa, enda ekkert annað hægt í stöðunni.

Það er alveg ný tilfinning fyrir mig að hafa svona mikið vit á fótbolta. Yndislegt alveg hreint.

Sudoku-krapp

Það er nú óneitanlega lítt spennandi að telja sig nokkuð kláran í einhverju en fá samt þessa niðurstöðu í smettið.



Bílów average mæ es. Reyndar gæti ég kennt vallaraðstæðum um (það er asnalegt lyklaborð á lappanum mínum) en burtséð frá öllu slíku þá á ég greinilega heilmikið inni. Tek út sumarfríið í bootcampsudoku-æfingarbúðum einhversstaðar (ef það væri svo hægt að sameina það með bjórdrykkju og svínakjötsáti þá væri það auðvitað optimalt).

Könnunarkrapp

Eftirfarandi samtal átti sér stað eigi alls fyrir löngu í gegnum GSM símtæki hins geðþekka góðkunningja æstra lesenda Krappetíkrappsins, æringjans Stilla Vebba:

(dring dring)

Stilli Vebba: Mjelló?

Fröken: Já Stilhjálmur? Sæll ég hringi frá Gapacent Callup. Má ég eyða nokkrum mínútum af þínum dýrmæta tíma í að hjálpa mammónískum stórfyrirtækjum að finna skilvirkari leið til að fá þig til að eyða sem mestum fjármunum í vörur þeirra og þjónustu?

Stilli Vebba (finnst frábært að einhver sýni honum athygli): Já þokkalega!

(Hefst þá spurningaleikur sem hefur greinilega aðallega það markmið að vita hvar Stilli versli spartlið sitt. “Hvorki né” er mjög algengt svar. Eitt sinn svarar Stilli því að hann telji vöruúrvalið vera meira í Byko þó hann hafi í rauninni ekki hugmynd um það, bara til að taka afstöðu í einhverjum af þeim brennandi málefnum sem bera á góma.)

Fröken: Að lokum langar mig til að spyrja þig nokkurra spurninga sem hjálpa til við úrvinnslu könnunarinnar.

Stilli Vebba: Æðisgengið.

Fröken: Hvað búa margir á heimilinu að þér meðtöldum?

Stilli Vebba: Umm... einn?

Fröken: Er það virkilega rétt?

Stilli Vebba: Nei reyndar ekki, svona strangt til tekið. Ég hagræddi sannleikanum. Ég bý heima hjá foreldrum mínum. Vildi bara ekki viðurkenna það. En það átti nú bara að vera tímabundin ráðstöfun. Sem er reyndar búin að vera tímabundin aðeins of lengi. Ég get reyndar litið svo á að heimili mitt takmarkist af herberginu mínu. Þá er ég bara einn á því heimili. Nema reyndar þá er tölvan hennar mömmu hérna inni og hún spilar dálítið mikinn kapal í henni.

Fröken: Ég skil. Næsta spurning. Hefur þú stundað framhalds- eða háskólanám?

Stilli Vebba (stoltur): Bæði! Ekkert smá menntaður!

Fröken: Hefur þú lokið háskólanámi?

Stilli Vebba (minna stoltur): Nei. Af hverju þurftirðu endilega að spyrja að þessu? Heldurðu að ég sé eitthvað stoltur af því að vanta þrjár skitnar sænskar einingar upp á að fá gráðuna? Þið Callup-pakk núið mér þessu um nasir í hvert einasta skipti sem ég leyfi ykkur að nota mig sem ódýra skoðanahóru. Hvers á ég eiginlega að gjalda?

Fröken: Afsakið Stilhjálmur minn, ég er nú bara að vinna vinnuna mína.

Stilli Vebba: Já það sögðu líka nasistarnir. Og verktakarnir í Álafosskvos.

Fröken: Þetta var nú óþarfi.

Stilli Vebba: Sorrí.

Fröken: Hversu oft hefur þú vaknað í eigin ælu á síðustu 12 mánuðum?

Stilli Vebba: Einu sinni. Reyndar mætti hafa það tvisvar, en það var þó sama ælan í bæði skiptin.

Fröken: Að lokum vil ég nefna að ég hef verið æstur lesandi Krappetíkrappsins til margra ára. Vefsetrið atarna stendur svo sannarlega undir nafni sem hjólnöf afþreyingarefnis á Veraldarvefnum.

Stilli Vebba: Já takk fyrir það. Ég skal skila því til míns góða félaga Villa Stebba.

Fröken: Fannst þér þessi könnun vera of stutt, hæfilega löng eða of löng?

Stilli Vebba: Of stutt. Ég hef ekkert þarfara að gera.

Fröken: Ollræt, flippað. Við verðum þá bara í bandi næst þegar þörf er á frekara áliti þínu á vörum og þjónustu ýmsra mammónískra stórfyrirtækja.

Stilli Vebba: Nó problem. Mæ plesjör. Puss och hej.

Fröken: Hej hej.

Stilli Vebba: Hej.

Fröken: Hej.

Bröllops-krapp

Undanfarið hefur gætt talsverðrar lægðar í birtingu mynda af hressu og skemmtilegu fólki að geifla sig á Krappetíkrappinu. Hér verður gerð bragarbót á því með þessu geiflmynda-extravaganza úr suðurnesja-brúðkaupi hjónanna Rúnars Leifssonar og Brynhildar Þórðardóttur. Vonandi fellur extravaganzað vel í kramið. Ókrýndur geifl-meistari dagsins var Kjartan Sigtryggsson. Að launum býðst honum að leggja æru sína að veði og skora aðalritara Krappetíkrappsins á hólm í hinu margrómaða borðspili "Lost valley of the dinosaurs".

Rageagainsthemachine-krapp

Hin gagnmerka hljómsveit Rage Against the Machine spiluðu opinberlega saman í fyrrakvöld. Var það í fyrsta skipti í tæp 7 ár. Æðstaráð Krappetíkrappsins lýsir yfir fullum stuðningi við þessa þróun mála, og vonast til að sjá þá hressa með 16 ára ball í KA heimilinu um næstkomandi Verslunarmannahelgi.



Jútjúb er auðvitað orðið barmafullt af vídeóklippum í mjög vafasömum gæðum. Þetta vídeó er hársbreidd frá því að ná stemningunni hjá DJ Sigga Rún 5 mínútum fyrir lokun á Kaffi Ak. Down Rodeo og Renegades of Funk rokka feitt. Annars er fullt af þessu rusli hérna.

Fyrst ég er einu sinni byrjaður þá er vel þess virði að skella inn tilvísun á Tom Morello sóló í hressri kassagítarsverkalýðsstemningu. Skipulagsmistök af verstu gerð að hann skuli ekki vera að spila á Ráðhústorgi í tilefni af alþjóðlegum frídegi verkamanna. Þeir sem vilja sjá mjúku hliðina á Zack de la Rocha eru kvattir til að sjá og heyra hann spila og syngja mexíkóska þjóðlagatónlist af stakri snilld. Súra rúsínan í pylsuendanum er svo leiksigur Tom Morello í gestahlutverki í Star Trek Voyager. Assgoti súrt.

Hjónabandskrapp

Klerkar þjóðkirkjunnar tóku nýlega opinberlega afstöðu gegn hjónavígslu samkynhneigðra. Upplagt er því að minnast á að sértrúarsöfnuðurinn MOLINN (est. 1993) hefur frá upphafi beinlínis hvatt til hjónabanda samkynhneigðra og litið á þau sem fullkomlega jafngild öðrum hjónaböndum. Að auki er fjöldi einstaklinga í hjónabandi af hvoru kyni gefinn algjörlega frjáls í Molanum. Þannig gæti ég t.d. gengið að eiga alla meðlimi Arsenal klúbbsins á Íslandi án þess að það sé litið neinu einasta hornauga. Jafnvel skellt með nokkrum hressum BDSM iðkendum for gúdd mesjör. "Frelsið er yndislegt" eins og segir í gömlum sunnlenskum kvæðabálki.

Þess má geta að öllum nýskráningum í Molann fram til 1. júní mun fylgja ókeypis samverustund með Æðstaprestinum þar sem valið stendur á milli þess að spila Axis & Allies eða horfa á Howard the Duck. Ekki amalegur pakki það.

Nasdaq-krapp

Síðan ég hætti í skólanum (ath. ég nota ekki orðið "útskrifast") þá hef ég alltaf verið í sömu vinnu, en eins og er móðins í þessum síbreytilega kapítalístíska heimi þá valda skipulagsbreytingar því að batteríið hefur nokkuð reglulega skipt um nafn. Fyrst var það Fjármálalausnir, síðan Libra, svo TölvuMyndir, sem alþjóðavæddist í formi TM Software sem loks seldi okkur til sænska fyrirtækisins OMX. Rættist þar með langþráður draumur minn að fá netfang á forminu fornafn.eftirnafn@eitthvaðgroup.com. Þau gerast ekki mikið flottari.

Núna er ég farinn að venjast núverandi fyrirkomulagi nokkuð vel, en fæ svo þetta framan í mig eins og gusu af hráu kjötfarsi: Nasdaq sagt hafa boðið í OMX. Neita því reyndar ekki að það yrði nokkuð flippað að vinna á Akureyrarskrifstofu Nasdaq. Sem myndi reyndar innan tíðar breytast í Akureyrarskrifstofu alþjóðasamsteypunnar GloboCorp®. Sem yrði svo hvorteðer þjóðnýtt í byltingunni þegar markaðurinn mun implódera og öryrkjarnir erfa jörðina. Þannig að þetta er sennilega allt á réttri leið eftir allt saman.

Norðmannakrapp

Skelli hérna inn tveimur hressum Norðmannabröndurum úr hinu merka riti Hemliga dassboken.

Hvað færðu ef þú klippir A4 blað í tvennt?

Norskt púsluspil.

og

Hvað er 10 kílómetra langt og með greindarvísitölu upp á 23?

Norsk kröfuganga.

Vonandi getur RobbiK slegið um sig með þessu næst þegar hann fer í bissnessferð til Oslóar.

ULTIMATE LABYRINTH-krapp

Nú er loks hægt að avslöja því hér á Krappetíkrappinu að í vinnslu er enn einn leikurinn í hinni sívinsælu ULTIMATE leikjaröð, sem getið hefur af sér klassíkera svo sem ULTIMATE 10.000 og ULTIMATE GRAND MASTERMIND. Í þetta skiptið hefur ULTIMATE liðið ákveðið að takast á við að stafrænisera hið sívinsæla þýska þroskaspil "DAS VERRÜCKTE LABYRINTH" , sem ætti að vera hverjum sjálfsvirðandi spilaáhugamanni vel kunnugt.

Ekki nóg með það heldur hefur æðstaráð Krappetíkrappsins fengið leyfi til að birta EXXKLÚSíV skrínsjott úr þessum nýja byltingarkennda tölvuleik sem væntanlega munu æsa upp æsta lesendur Krappetíkrappsins um allan helming og vekja upp sterka þrá og löngun í að spila þetta meistarastykki ekki seinna en núna.

Leikurinn er væntanlegur um jólin 2007.

Citroën-og-Taunus-krapp

Nú hafa gamli tíminn og sá nýji endanlega runnið saman í eitt, því mér skilst að hin tuttugu ára gamla Citroën bifreið móður minnar (Gráni, A-257) sé nú orðin útbúin mp3-afspilunarmöguleika. Hvernig Gráni hefur getað verið nothæfur öll þessi ár án þessa er mér svo sannarlega hulin ráðgáta.



Aðrar fréttir tengdar bílaeign foreldra minna er sú að hinn hundtryggi Ford Taunus skutbíll föður míns (A-1773) fagnaði um daginn 25 ára afmæli sínu, og hefur örugglega aldrei verið sprækari en nú. Það er ekkert sem þjálfar upphandleggsvöðvana betur en að taka U-beygju á Taunusnum, sem þarf ósjaldan að gera í Þórunnarstrætinu þökk sé girðingarinnar sem aðskilur akreinarnar fyrir utan húsið.



Ég sá einmitt á skattframtali heimilisins að bílaeignin er metin á samtals 125 þúsund, Gráni á 59 þúsund og Taunusinn á 66. Yndislegt að eiga svona nægjusama foreldra (sem eru þó með flatskjá í eldhúsinu).

Fermingarkrapp

Eins og áður var lofað þá er æstum lesendum hér með boðið upp á Fermingarhvalinn^TM, enda ekki seinna vænna þar sem flóð ferminga mun brátt dynja á landsmönnum (æðstiprestur Krappetíkrappsins virðist samt vera undanskilinn þar sem honum hefur ekki verið boðið í fermingarveislu í óendanlega mörg ár).

Tilvalinn til að prenta út og nota framaná kort til fermingarbarnsins, nú eða stækka almennilega og gefa barninu hvalinn sem 1x2 metra plaggat.

Af sama tilefni er upplagt að birta hér fallega mynd af vini okkar Stilla Vebba á unga aldri, þar sem hann skartar klippingu sem á engan sína líka í gjörvallri veröld. Stilli hafði verið á mótþróaskeiði allan áttunda bekkinn og safnað þessum líka fína lubba. Þegar líða tók að fermingunni þótti móður hans (Felgu Hrímanns) heldur sárt að hún myndi ekki geta séð framan í blessað barnið á fermingardaginn og því leituðu mæðginin sátta í þessu máli. Málamiðlunin var fólgin í því að villti lubbinn var látinn halda sér að velflestu leyti, nema klippt var frá andlitinu með aðstoð reglustiku. Þar með fæddist þessi ódauðlega fermingarklipping.

Vert er að geta þess að Krappetíkrappið hefur undir höndum digital útgáfur af öllum fermingarmyndum samnemenda Stilla í bekknum 4.V úr ónefndum Menntaskóla. Þar stunduðu nám nafntogaðir einstaklingar svo sem Rarpa Heynis, Kauður Aren og sveitadrengurinn Hörn Bjuldar. Óhætt er að fullyrða að klipping Stilla bliknar í samanburðinum við listaverkin sem prýða sum af bekkjarsystkinum hans.

Mintukrapp

Var svo heppinn að fá ekkert-alltof-útrunnið prufueintak af þessum mintum upp í hendurnar í gær. Mér skilst að þær hafi ekki verið langlífar á íslenskum markaði, sennilega á fólk erfitt með að borða nammi úr sígarettu-skreyttum umbúðum. Bévítans pólítískt-rétthugsandi pakk.



En þeir ljúga því ekki að minturnar eru ferskar, þrátt fyrir að vera eilítið komnar framyfir síðasta söludag.

Þjóðfélagsumræðukrapp

Æðstaráð Krappetíkrappsins hefur ákveðið að eftirfarandi ljósmyndir skuli verða innlegg väfsätursins í þjóðfélagsumræðu síðustu daga:



Photo credit: Stefan Vilhjalmsson, www.kjotmat.is

Nýju jórvíkur-krapp II

Ég hef þann leiða ávana að eiga það til að taka myndir af sjálfum mér með hinum og þessum mætu einstaklingum, oftar en ekki með einhvern kjánalegan svip uppsettan. Þetta breytist ekkert þó ég fari til útlanda, það er nokkuð ljóst.

Nýju-jórvíkur krapp

Þá hefur æðstiprestur Krappetíkrappsins snúið aftur relatívt heill á húfi úr svallferð mikilli til Nýju Jórvíkur-borgar, USA. Þar upplifðum við Vari frændi kúltúrell extravagönz á borð við að panta stóra kók í bíó (og hafa möguleika á free refill á líterinn) og að fara á dvergvaxinn djassklúbb í dýpstu iðrum Harlem-hverfisins (afsakið ofstuðlunina). Gamli risaeðlunördinn í mér vaknaði til lífsins við að fara í Museum of Natural History (fórum síðan á Night at the Museum um kvöldið á gígantískum ÆMAX skjá til að maxa reynsluna, en sú mynd er lítið annað en tæknibrellurúnk eins og við var að búast), og ég kom sjálfum mér á óvart með því að hafa í rauninni gaman af því að skoða misgömul málverk eftir misgamla farta í Metropolitan Museum of Art. Við Vari hlupum reyndar í gegnum það safn til að geta neimdroppað sem flestum frægum förtum þegar við kæmum út (eins og Mónei, Warhol og Rembrant), en þau hlaup tóku samt 5 tíma.

Aðalpartíið var síðan auðvitað brúðkaupssvall Dabba Franz og Alexöndru Suppes, sem heppnaðist með eindæmum vel. Þar var samankominn rjómi Amerískrar æsku á sviði allskonar vísinda och fræða, sem var alltsaman indælisfólk. Það var alltént ekki erfitt að fá á tilfinninguna að það væru ekki margir á svæðinu sem styddu Bush-stjórnina. En þetta var hrottalega góð veisla, með brilljant mat og mjög hressandi svalli.

Um leið og færi gefst til mun æstum lesendum verða gefinn kostur á að berja myndir úr ferðinni augum. Á meðan eru æstir lesendur beðnir um að sýna biðlund.