Borðtölvukrapp

Var að nettengja borðtölvuna mína í fyrsta skipti í einhver 5 ár. Sjötíu og fjórum windóws öppdeitum síðar er alveg gráupplagt að blogga eins og það sé tvöþúsundogfimm!!!!

Modde-ra-tana-krapp

Fljótlega uppúr 45 sekúndna markinu í þessari frétt kemur einn sá allra svæsnasti sænskuframburður sem ég hef heyrt frá íslenskum fréttamanni. "Modde-ra-tana". HVAR ERTU BOGI ÁGÚSTSSON, ÉG ÞARFNAST ÞÍN!!!

Interpól-krapp

Krappetíkrapp kynnir: Interpól-bálkurinn.

1.
Mér lýsir eftir Interpól,
ei veit ég hvað skal gera?
Jú! Þýfi stinga undir stól,
og stela lite mera*!

*ATH Stíf sukkpartí við Stureplan í Stokkhólmi valda tíðum sænskuslettum hjá yfirmönnum gamla Kaupþings.

2.
Nú halda vil ég heilög jól
og hátíð- vera -legur
Þá allt í einu Interpól
á eyrum burt mig dregur!

3.
Í mér blundar bankafól
sem brýst fram reglulega.
Þá á mig stekkur Interpól!
Ég aumur fyllist trega :(.

4.
Mér finnst gott að klæðast kjól
og klína á mig farða.
Af hverju skyldi Interpól
um það nokkuð varða?

5.
Í ofsa-tjilli á Tortól-
-a það væri skaði
ef mig fyndi Interpól
með innfæddum í baði**!

**Óritskoðuð útfærsla á síðustu línu fæst aðeins munnlega.

Dokusápu-krapp

Gaman að fá svona öppdeit frá Gautaborgar-Aðalheiði á því hvaða dokusåpur eru heitar þessa dagana í Svíaríki. Þegar ég var upp á mitt besta þá voru aðalþættirnir Robinson, Baren og Big brother (reyndar er Survivor í rauninni útlensk útgáfa af Robinson því sænski þátturinn kom á undan). Það besta við dokusåpurnar er þegar þetta lið sem nær langt í þáttunum verður svokallað kändis og er þá ævinlega eftir það kennt við þáttinn sem það kom fram í. Hver man ekki eftir Robinson-Robban, Baren-Fredde og Farmen-Andreas? Þau eru síðan endalaust að dúkka upp sem svokallaður joker eða óvæntur þáttakandi í öðrum seríum, enda vita þeir sem pródúsera þetta gæðastöff að það er præsless að sjá svipinn á þáttakendum þegar hinn alræmdi Big brother-Jonas er kynntur til sögunnar í leiknum þegar sextánda sísonið af Baren er rétt hálfnað.

Hápunkturinn á Svíþjóðardvöl minni var einmitt þegar ég var í x2000 lestinni á milli Sthlm og Skaufabæjar (með Robba og Ragga minnir mig) og við föttuðum helt plötsligt að hin legendarísku Baren-Ingo og Baren-Meral voru í sama vagni og við. Sátu bara nokkrum metrum frá okkur. Slíkar axlastrokur við fræga fólkið hef ég ekki upplifað hvorki fyrr né síðar.

Veðurkrapp

Á svona dögum er ekki annað hægt en að blogga um veðrið og láta tiltölulega handahófskennda mynd fylgja með.

Radíókrapp

Á sunnudögum fer nú fram merkileg röð viðtala í þættinum Helgarútgáfunni. Fyrir tæpum tveim vikum var það Rúnar Leifsson fornleifafræðingur sem leit í heimsókn og ræddi m.a. um hinar merku kvikmyndir Howard the Duck og The Stuff. Núna síðast var viðmælandinn svo Vilhjálmur Stefánsson tölvunarfræðingur sem fór yfir glæstan en snarpan feril hljómsveitarinnar LBA (feis/speis) með þáttarstjórnanda. Þar var tónlist sveitarinnar spiluð í fyrsta skipti í ríkisreknu útvarpi svo vitað sé, og það er óneitanlega tilhlökkunarefni að fá spikfeitan STEF-tékkann inn um lúguna að ári liðnu. Rúnar er hægt að hlusta á hér (eftir ca. 1:24) og Vilhjálm er hægt að hlusta á hér (eftir ca. 1:16). Eftir báða þættina gjörsamlega skíðloguðu moggabloggheimar af ummælum æstra húsmæðra sem fögnuðu þessum útvarpsviðtölum og töldu þau óaðfinnanlega ráðstöfun á nefskattpeningum sínum. Skal það engan undra sem á hefur hlýtt.

Háskólaútskriftarkrapp

Fyrir nokkrum vikum síðan rölti ég á pósthúsið og sótti ábyrgðarbréf, sem reyndist innihalda skínandi prófgráðu frá hinum sænska Skaufabæjarháskóla. Mikið gladdi það mig óskaplega, enda voru þá liðin 9 ár og 6 mánuðir síðan ég settist fyrst á skólabekk við téðan skóla. Það var orðið nokkuð þreytt þegar menntun barst í tal að þurfa alltaf að útskýra að ég væri sko í rauninni bara 97,5% tölvunarfræðingur og ætti alltaf einn áfanga eftir, og það væri sko allt einhverjum hundlélegum fúlskeggjuðum þýskum prófessor að kenna. Þeir tímar eru allavega liðnir, þannig að ég mun næst geta gefið mjög afdráttarlaust svar næst þegar Gallup hringir og vill vita allt um menntun mína. Beinn ávinningur af þessari prófgráðu er svosem enginn annar, ég er allavega með nógu mikla lokaverkefnisfóbíu til að tilhugsunin um mastersnám valdi mér svima og ógleði.

Ég hélt svo smá kaffiboð fyrir vini og vandamenn fyrir nokkrum vikum, þar sem þessi mynd var tekin af mér, RobbaK og JFK. Það væri nú í góðu lagi að hafa svona míní-haus vaxandi útúr öxlinni á mér ef hann væri ekki sífellt tuðandi allan liðlangan daginn. "Getum við stoppað í sjoppu?", "Mig langar í ís", "Ég vil ekki horfa á Howard the duck enn einu sinni". Óþolandi.



Svona lítur þessi skínandi prófgráða svo út. Ég fékk að sjálfsögðu 5 í öllum áföngunum.



Fleiri epískar myndir má sjá hér.

Sprengidags-semlukrapp

Á morgun mun sótsvartur íslenskur almúginn spæna í sig brimsalt dilkakjöt og baunasúpu. Þá munum við með réttu tengslin einnig útvíkka bolludaginn og taka sænsku útgáfuna, sem innebär gegndarlausa neyslu af svokölluðum semlum. Semla er hveitibolla fyllt með marsípanmassa og rjóma með stráðum flórsykri á toppinum, og gæti litið u.þ.b. svona út:



Hægt er að borða þær með kaffi eða kaldri mjólk, en ef ætlunin er að vera almennilega svænskur óldskúl þá er semlunni skellt í djúpan disk, hellt yfir flóaðri mjólk og svo borðað með skeið. Ég var rétt í þessu að heimsækja minn hundtrygga semlu-díler útí þorpi og sneri aftur með sex dýrindis semlor í boxi. Stefni að því að taka þær með í vinnuna á morgun og púlla svokallaðan Adolf Friðrik. Eins og segir á Wikipedia:

"King Adolf Frederick of Sweden died of digestion problems on February 12, 1771 after consuming a meal consisting of lobster, caviar, sauerkraut, smoked herring and champagne, which was topped off by 14 servings of semla, with bowls of hot milk. Semla was the king's favorite dessert."

Hin margumtalaða kreppa hafði að sjálfsögðu snert semlu-iðnaðinn eins og annað og því gat ég bara fengið sex stykki hjá dílernum sama hvað tautaði og raulaði. Þannig að þó ég setji sýslumet í saltkjets- og baunaáti í hádeginu á morgun, þá mun ég sennilega ekki ná sama glæsta árangri og Adolf. Það er kannski bara eins gott.

Það sem er síðan extra gott við sænska bolludaginn er að hann er endurtekinn á hverjum þriðjudegi fram að páskum. Það er eitthvað sem íslenska útgáfan mætti taka sér til fyrirmyndar. Enda þekkir það hvert mannsbarn að það er lífsins ómögulegt að borða nægju sína af rjómabollum, síðasti bitinn af hverri bollu kallar bara strax á næstu.

cheezburger.com-krapp

Ég verð að játa fyrir æstum lesendum Krappetíkrappsins, að svo til eina ástæðan fyrir því að taka nýjan Búbúkisa í fóstur var draumurinn að ná að koma honum í hóp hnyttnustu katta heims á icanhascheezburger.com. Það hefur ekki gengið vel. Hann er reyndar fyllilega nógu sætur og krúttlegur, ég virðist bara vera einum of krappí ljósmyndari til að ná að fanga það almennilega. Hann er alveg biksvartur, þannig að eina leiðin til að taka mynd af honum á venjulega vasamyndavél er að nota flass, sem verður þá til þess að hann fær þetta ákaflega andsetna og ekki-alveg-nógu-krúttlega augnaráð.





Reyndar náði ég hérna nokkuð skemmtilegu skoti, en enn og aftur þá er þetta ekki að skora nógu hátt á krúttleikaskalanum fyrir cheezburgerinn. Þetta er ekki draumakötturinn til að mæta síðla kvölds í dimmu húsasundi.



Kettlingalúkkið er óðum að eldast af honum þannig að sennilega er ég of seinn til að ná honum inn á einhverju svona eða svona. En þá er spurning um að ala hann dulítið lengur þangað til hann verður gjaldgengur í eitthvað svona.

Gestabókarkrapp

Krappetíkrappið hefur aldrei verið feimið við að blanda sér í pólitíska umræðu, hvort sem er á landsvísu eða í heimsmálum. Þess vegna mun þetta krapp fjalla um gestabækur.

Foreldrar mínir háaldraðir hafa kennt mér ýmislegt misgagnlegt, en af því gagnlega má nefna ágæti gestabóka. Það er sjaldan að einhver þrýsti nefbroddinum inn um dyrnar í Þór103 án þess að vera neyddur til að skrifa í gestabókina fyrir brottför. Enda eru til nokkrar útfylltar bækur í arkvívum heimilisins sem spanna meira en 30 ára búskap og eru einkar fróðleg söguleg heimild. Færslurnar eru misgóðar, þær bestu eru yfirleitt frá kvöldi 17. júní þegar árlegt Oddeyrargötugrill-svall fer fram. Um seinnipart 9. áratugarins var ekki óalgengt að hver 17. júní-gestur tæki sér heila blaðsíðu undir sína kveðju. Skrifaði endilega ekki endilega mikið en með þeim mun stærra og óskiljanlegra letri.

Besta færslan sem ég hef séð er þó frá upphafi þessa áratugar, einmitt úr svallpartíi, þó ekki 17. júní svalli. Þarna hafði ungur maður verið í heimsókn sem svo oft áður, og skrifaði síðla nætur stutta en hnitmiðaða kveðju sem ég ætla hér með að gera endanlega ódauðlega og deila með æstum lesendum Krappetíkrappsins. Nafn viðkomandi hefur verið ruglað með þartilgerðu tóli í MsPaint en það ætti ekki að hindra suma glögga lesendur að härleda sig fram til skrivarrens identítät, sérstaklega ef þeir hafa einhverntíman deilt skólabekk með höfundi. Smellið til að stækka.

Dýraspítalakrapp

Hér er einhver löghlýðinn borgari búinn að setja inn glás af dýraspítalasketsjum. Krappetíkrappið kann honum bestu þakkir fyrir.

Bókhaldskattarkrapp

Þessa dagana reyni ég að halda í minninu í nokkra daga í viðbót hvernig færa eigi fyllilega raunhæf dæmi eins og þetta í bókhald:

Eigum vöruskipti við félaga okkar í byggingariðnaðnum. Við seljum honum vsk bifreið sem metin er á kr. 450.000 auk vsk. Í staðinn lætur hann okkur fá trésmíðavél. Við teljum að trésmíðavélin sé minna virði en bíllinn og því er ákveðið að hann greiði 100.000 í milli með víxli til tveggja mánaða með 16% ársvöxtum. Bókfært verð bifreiðarinnar er 370.000. Færið einnig söluhagnað eða tap.

Þegar ég verð búinn að rúlla prófi í þessu krappi upp á mánudaginn verður mér ekkert til fyrirstöðu að senda þær niðurstöður til Svíþjóðar og fá að lokum til baka skínandi pappír sem segir að ég hafi lokið einhvers konar háskólagráðu á bakkalársstigi í einhverju sem tengist tölvum. Það er alveg nógu gott fyrir mig. Þá verða ekki nema 9,5 ár liðin frá því að ég skellti mér upphaflega til Svíþjóðar í skóla. Spurning hvor mér hafi tekist að vera lengur að þessu en Gísli Marteinn, er ekki viss. En þá verður allavega partí.

Það mun annars örugglega hafa eilítil neikvæð áhrif á einkunnina að eiga svona gríðarlega athyglissjúkan herbergisfélaga. Sökum þess get ég bara lært með annarri hendinni.

Alþingisgagnfræðiskólakrapp

Haustið 1991 lét þáverandi forsætisráðherra ummæli falla á alþingi þess efnis að það mætti helst líkja skrípalátunum sem viðgengust þar við gagnfræðaskóla. Í kjölfarið sendu nokkrir ungir menn frá sér ályktun í dagblaðið Dag þar sem þeir fordæmdu þessi ummæli á þeim forsendum að þeir stundi nám við eina skóla landsins sem enn héti gagnfræðaskóli, og þeir kannist ekki við slík skrílslæti í sínum skóla*. Krafan var að forsætisráðherra sýndi iðrun ummæla sinna eða segði af sér ella. Í framhaldinu voru ungu mennirnir boðaðir í símaviðtal í síðdegisútvarpi Rásar2 þar sem fulltrúi hópsins var grillaður af óvægnum fréttasnápi.

Þessi yfirlýsing frá Æðstaráði 8. bekkjar D var rifjuð upp ásamt meðfylgjandi útvarpsviðtali í útvarpsþættinum Fyrst og fremst á Rás2 á sunnudaginn og ég mæli eindregið með því að æstir lesendur Krappetíkrappsins smelli hér og spóli áfram á 9:30 og njótið.

* Það voru vissulega oggolítil skrílslæti í 8D (sem var kynjaskiptur strákabekkur) en þau voru af öðrum toga en á þinginu.

3tugsafmæliskrapp

Eins og einhverjir æstir lesendur vita núþegar þá náði æðstiprestur Krappetíkrappsins þeim merka áfanga að verða þrítugur um daginn. Dagurinn fól í sér töluverð óvænt ævintýri, m.a. eyddi æðstipresturinn stuttri stund síðdegis liggjandi á bakinu ofaní drullupolli fyrir framan Gardínubúðina. Fyrr en varði var hann þó kominn upp á skrifstofu og íklæddur engum buxum, þannig að þar má segja að loksins hafi ræst úr buxnalausa föstudeginum sem svo lengi hafði staðið í bígerð að halda hátíðlegan.

En æðstipresturinn tók gleði sína á ný um kvöldið þegar gestir fóru að streyma í hefðbundið grjónagrautsát að heimili foreldra hans. Það sem stóð upp úr þeirri veislu (eins og í öllum góðum veislum) voru að sjálfsögðu gjafirnar.


Hörður og Adda mættu færandi hendi með gott safn Sven Hassel bóka til að stytta æðstaprestinum stundirnar.


Kjartan færði æðstaprestinum listaverkið "Legumynd I".


Listaverkið lítur u.þ.b. svona út. Smekklega sjúskað lúkk á æðstaprestinum.


Drengur Óla og Hildur Ása slógu í gegn með einkar þjóðlegri gjöf, tveimur lifrarpylsukeppum og vodkafleyg í þartilgerðri gjafaöskju.


Hér sést Kjartan pósa með kjeppzunum tveim.



Síðast en ekki síst má nefna awesome Stafrófs-spilastokk frá Fanney Dóru þar sem finna má alla frá Loðni og Hans-Óla til Tjörva Stór-Moffa.

Svo var tekið trivjal og popppunktur til sex að venju. Í alla staði framúrskarandi grjónagrauts-svallpartí. Fleiri myndir hér.

Gagnslaust upplýsingakrapp

Ég lenti fyrir stuttu í svokölluðu klukki af hendi Hafdísar og get ekki skorast undan því.

1. Fjögur störf sem ég hef unnið um ævina:

• Skera álegg í Kjötiðnaðarstöð KEA, Oddeyri.
• Þurrka hausa í Fiskvinnslustöð KEA, Hrísey.
• Malbikun (sumar) og handvirkur snjómokstur (vetur), gatnagerð Akureyrarbæjar.
• Verðmætasköpun og aukning hagvaxtar, Fjármálalausnir/Libra/TM Software/OMX/NASDAQ OMX.
  

2. Fjórar íslenskar bíómyndir sem ég held upp á:

• Sódóma Reykjavík
• Nema Howard the Duck megi teljast íslensk þá segi ég pass við hinum þremur.
  

3. Fjórir staðir sem ég hef búið á:

• Akureyri (sunnan við á)
• Hrísey (verbúð)
• Skaufabær (Skövde)
• Akureyri aftur (sunnan við á)
  

(aukaspurning) 3.a Einn staður sem ég myndi aldrei búa á:

• Akureyri (norðan við á) – þar er glæpatíðni með því mesta sem þekkist í heiminum og enginn hættir sér út óvopnaður eftir fjögur á daginn.

4. Fjórir staðir sem ég hef heimsótt í fríum:

• Svíþjóð
• Japan
• England (oftar en ekki til að fara á einhverja villta tónlistarhátíð)
• Mjóifjörður eystri (besti fjörður ever)
  

5. Fjórir sjónvarpsþættir sem mér líkar:

• Battlestar Galactica
• Arrested development
• Lost
• South park
  

6. Fjórar síður sem ég skoða daglega:

• Blogggáttin
• iGoogle
• Feisbúkk
• Vísir.is (aðallega út af ”Britney með kynsjúkdóm – myndir”-fréttunum)
  

7. Fernt sem ég held upp á matarkyns:

• Bráðinn ostur
• Mexíkanskt sull (má gjarnan innihalda bráðinn ost)
• Núðlur
• Meiri bráðinn ostur (gjarnan kombinerað með glóðuðu deigi af einhverri sort)
  

8. Fjórar bækur sem ég hef oft lesið:

• Flugrás 714 til Sydney
• Ástríkur og sonur
• Z fyrir Zorglúbb
• Eitthvað af Dark tower seríunni eftir Stephen King.
  

9. Fjórir staðir sem ég myndi helst vilja vera á núna:

• Á feitum RATM tónleikum
• Á feitum Maiden tónleikum
• Á feitum Deftones tónleikum
• Á feitum Pantera tónleikum árið 1994
  

10. Fjórir bloggarar sem ég klukka (þ.e. þurfa að gefa upp samsvarandi gagnslausar upplýsingar):

• RobbiK
• Drengur
• Allý
• Geiri Kippa

Burt með borgarastéttina-krapp II

Dr. Gunni skrifaði um daginn að nú í kreppunni væri pönkið að koma aftur af fullum krafti. Það er því ekkert meira viðeigandi en að hala niður pönkþröngskívu hljómsveitarinnar Burt með borgarastéttina ef æstur lesandi er ekki búinn að því núþegar. Hérna sést einmitt sveitin flytja lagið Afmæli með Sykurmolunum í kraftmikilli akústískri útgáfu. Hrafnkell söngvari Burt með borgarastéttina gefur Bjork nákvæmlega ekkert eftir í túlkun og tækni.

Burt með borgarastéttina-krapp

Það er löngu tímabært að kynna til sögunar á Krappetíkrappinu pönk-þröngskívuna Burt með borgarastéttina með hljómsveitinni Burt með borgarastéttina, sem sést hér fyrir ofan í sínum upprunalegu umbúðum. Þessi pönk-þröngskíva var samin og tekin upp snemma í september og kemur nú loksins fyrir eyru almennings í formi ókeypis niðurhals (eftir strangt ferli við að færa upptökurnar af snældu yfir á mp3 þannig að sem minnst af hinum upprunalega pönk-anda glatist). Hljóðfæraskipan Burt með borgarastéttina er sem hér segir:

• Söngur: Hrafnkell
• 6 strengja gítar: Vilhjálmur
• Bassi: Þorgils, e.þ.s. Nolem
• Trumbur: Gunnar.jóhannesson

Pönk-þröngskívan telur heil 6 lög, en vegna mistaka í upptökustjórn þá lifðu aðeins 5 þeirra af á bandinu.

Hlaðið niður skívunni hér á mp3 formi!

Lagalisti:

1. Burt með borgarastéttina

Skívan sparkast í gang með titillaginu sem er kraftmikil pönk-epík... "allt sama helvítis hræsnarapakkið."

2. Tvatlskrift

Til að fyrirbyggja misskilning þá er riffið ekki stolið frá Purrkinum.

3. Útgubbuð kaffi karólína

Semí-átóbíógrafískt lag af gamla skólanum.

5. Sannleikurinn um Ægi Dagsson

Eins og skrattinn úr sauðaleggnum kemur kraftmikil og tilfinningaþrungin ballaða.

6. There's a long long road to dagverðareyri.

Þetta uppgjör textahöfundarins við gatnagerð í Hörgárbyggð er ótrúlegt áheyrnar.

Það er upplagt að njóta nokkurra ljósmynda af hljómsveitinni um leið og rennt er í gegnum þessa frumraun hennar (sem tekur u.þ.b. 8 mínútur að gera, og slær þar með við Tilf með Purrkinum um ca. 2 mínútur).


Hér spilar hljómsveitin 5 teninga yatszee ásamt því að snæða bobba og kleinur.


Yhatzhee blaðið var þéttskrifað.


Hér lenti hljómsveitin á popphjólinu og þurfti að spreyta sig á Afmæli með Sykurmolunum.


Mikil innlifun.

Að lokum ber að þakka menningarfélaginu Populus Tremula kærlega fyrir lán á upptökuaðstöðu.

Búbúkisakrapp II

Stefnt er að því að æsispennandi heads-upp pókereinvígi á milli Bjölla Búbúkisa og Frimma bróður verði krúnudjásnin í komandi jóladagskrá SkjásEins. Hérna sést Bjölli í stífum æfingabúðum ásamt Dreng skoðanabróður sínum.

Línumannskrapp

Eitt sinn endur fyrir löngu var handboltaferill minn í glæstum hæðum þar sem ég stóð sem helmassað varnartröll á línunni og spændi í mig hvern Þórsarann á fætur öðrum sem dirfðust að leggja í mig. Í sóknarleiknum var ég skjótari en elding og hlaut viðurnefnið Engisprettan fyrir vikið. Það er því grátlegt að hugsa til þess að ef ég hefði ekki þurft að hætta handboltaiðkun langt um aldur fram í 6. flokki vegna meiðsla á fingri þá hefði það verið ég sem hefði gefið grátandi fyrirliðanum stórstubbaknús eftir sigurinn í gær, og Fúsi hefði í staðinn horft á leikinn heima á brókinni í svekkelsi með fimm daga gamlan bernessósublett framan á hlýrabolnum.

Svona leika örlögin mann grátt stundum. Sei sei.

Búbúkisakrapp

Nú þykir ritstjórn Krappetíkrappsins tilefni til að birta myndir af tveimur miklum herramönnum sem eiga það sameiginlegt að hafa á einhverjum tímapunkti verið sambýlingar æðstaprests Krappetíkrappsins í H27.

Sá fyrrverandi er meistari Gunni.jóh sem hér fer hamförum í session-trommuleik fyrir avant-garde hljómsveitina "Johnny Public" í miklu svall-sveitabrúðkaupi Dags og Helgu.





Fyrir áhugasama um avant-garde tónlist þá má benda á að flutningurinn er fáanlegur á jútjúb hér.

Hinn sambýlingurinn er nýfluttur inn og er loðnari en Gunni.jóh, eins ótrúlegt og það hljómar.



Við innflutninginn hafði hann þegar hlotið nafnið Kolbjörn, og hlaut að sjálfsögðu eftirnafnið Búbúkisi II þegar ljóst var að hann væri þeirrar nafnbótar verður. Það er reyndar ekki alveg nógu þjált nafn þannig að mér finnst líklegt að það verði stytt niður í Bjölli í höfuðið á frænda hans í Kópavogi. Nú bíð ég bara spenntur eftir að hann vaxi úr grasi og verði viðræðuhæfur í stað þess að ráðast á allt sem hreyfist með kjafti og klóm.

Fyrst þessir tveir sambýlingar hafa verið nefndir til sögunnar þá er gaman að geta þess að annar er með ofnæmi fyrir hinum, en það á eftir að koma í ljós hvort það sé gagnkvæmt.